2024-nji ýylyň 26-njy dekabrynda Aba Annaýew adyndaky Halkara atçylyk akademiýasynyň “Ahalteke atlary - Parahatçylygyň ilçileri” ÝUNESKO klubynyň gurnamagynda täze ýyl baýramçylygy mynasybetli “New Year Fest 2025” atly dünýä ýurtlarynyň halklarynyň Täze ýyl baýramçylygynda taýýarlaýan milli tagamlarynyň festiwaly geçirildi.
Festiwala Hormatly myhman hökmünde Birleşen Milletler Guramasynyň Bilim, ylym we medeniýet boýunça guramasynyň (ÝUNESKO)-nyň işleri barada Türkmenistanyň milli toparynyň jogapkär sekretary, Türkmenistanyň Adatdan daşary we doly ygtyýarly ilçisi, Türkmenistanyň Gahrymany Çynar Täjiýewna Rüstemowa gatnaşdy.
Şeýle hem Ýurdumyzda hereket edýän ÝUNESKO klublarynyň we kafedralarynyň ýolbaşçylary, işjeň agzalary gatnaşdylar. Festiwalyň dowamynda Aba Annaýew adyndaky Halkara atçylyk akademiýasynyň bagtyýar talyp ýaşlary dostlukly döwletleriň milli tagamlaryny we beýleki milli däp-dessurlaryny, açyp görkezmekde we olaryň milli sungatyny ussatlyk bilen ýerine ýetirmekde öz ukyp başarnyklaryny görkezdiler. Olaryň ýerine ýetiren çykyşlary we taýýarlan milli tagamlary festiwala gatnaşan hormatly myhmanlar we professor mugallymlar tarapyndan gyzgyn garşylandy. Bu festiwal türkmen halkynyň dost-doganlyk gatnaşyklaryny berkitmekde, dünýä ýurtlaryny has-da jebisleşdirmekde özboluşly baýramçylyk öwüşgünine eýe boldy.
Festiwala gatnaşyjylar 2025-nji Täze ýyl baýramy bilen Gahryman Arkadagymyzy, Arkadagly Gahryman Serdarymyzy, ähli türkmen halkyny tüýs ýürekden gutladylar. Türkmen halkynyň milli Lideri Gahrymany Arkadagymyzyň, Hormatly Prezidentimiz Arkadagly Gahryman Serdarymyzyň janlarynyň sag, ömürleriniň uzak il-ýurt bähbitli alyp barýan işleriniň hemişe rowaçlyklara beslenmegini arzuw etdiler.
Gunça Şamyradowa,
Aba Annaýew adyndaky Halkara atçylyk akademiýasynyň mugallymy,
akademiýanyň “Ahalteke atlary-Parahatçylygyň ilçileri” ÝUNESKO klubynyň başlygy