Bilim-ylym adamzat üçin zerur bolan gymmatly baýlykdyr. Talyp ýaşlaryň halkara derejesine laýyk gelýän döwrebap bilim almagy, giň gözýetimli ýaşlar bolup ýetişmegi üçin Aba Annaýew adyndaky Halkara atçylyk akademiýasynda ähli mümkinçilikler döredilen. Bu mümkinçilikler, şertler öz miwesini hem berýär. Ýaşlaryň şäheri bolan Arkadag şäherinde ýerleşýän Aba Annaýew adyndaky Halkara atçylyk akademiýasynda bilim alýan talyp ýaşlar bilimde, ylymda, döredijilik bäsleşiklerinde, sport ýaryşlarynda guwandyryjy netijeleri gazanýarlar. Akademiýamyzyň talyp ýaşlary halkara derejesinde geçirilen ders bäsleşiklerinde 2 sany I orna, 9 sany II orna, 24 sany III orna we ýurdumyzyň ýokary okuw mekdepleriniň talyplarynyň okuw dersleri boýunça Döwlet bäsleşiginde 3 sany II orna, 7 sany III orna mynasyp boldular. Şeýle hem ýurdumyzyň ýokary okuw mekdepleriniň gurnamagynda geçirilen ders hem-de döredijilik bäsleşiklerinde 8 sany I orna, 21 sany II orna, 36 sany III orna mynasyp bolmaklary has hem buýsandyryjydyr.
Şu gün akademiýamyzda talyplary halkara hem-de döwlet derejesinde geçirilen bäsleşiklere taýýarlan mugallymlara we bäsleşiklerde üstünlikli çykyş edip baýrakly orunlara mynasyp bolan talyp ýaşlarymyza ýokary okuw mekdebimiziň rektorlygynyň Hormat hatlary we ýadygärlik sowgatlary gowşuryldy. Çäräniň dowamynda akademiýamyzyň döredijilik topary tarapyndan ýerine ýetirilen ajaýyp aýdymlar baýramçylyk dabarasyny has-da artdyrdy. Dabaranyň dowamynda ýaşlaryň döwrebap, kämil ylym-bilim almaklary üçin ähli zerur şertleri döredip berýän Gahryman Arkadagymyza, Arkadagly Gahryman Serdarymyza tüýs ýürekden alkyş sözleri aýdyldy.
Kakageldi Çaryberdiýew
Aba Annaýew adyndaky
Halkara atçylyk akademiýasynyň
mugallymy, Ýaş alymlar Geňeşiniň başlygy