Hormatly Prezidentimiziň ýolbaşçylygynda ýurdumyzda sanly bilim ulgamyny ösdürmek we döwrebaplaşdyrmak ugrunda giň gerimli işler durmuşa geçirilýär. Bu ugurda amala aşyrylýan taslamalar we geçirilýän bäsleşikler ýaşlary hem-de bilim işgärlerini innowasion tehnologiýalara çekmekde möhüm ähmiýete eýe bolýar.
Ýagşygeldi Kakaýew adyndaky Halkara nebit we gaz uniwersitetinde geçirilen Innowasion tehnologiýalar festiwalynyň çäklerinde elektron okuw toplumlarynyň bäsleşiginiň ýeňijileri sylaglanyldy. Türkmenistanyň Bilim ministrligi tarapyndan guralan bu çäre milli bilim ulgamynda sanly tehnologiýalaryň ornaşdyrylmagyna bagyşlanyp, mugallymlaryň we hünärmenleriň innowasion başlangyçlaryny goldady.
Şeýle abraýly bäsleşikde Aba Annaýew adyndaky Halkara atçylyk akademiýasynyň uly mugallymy Ejegül Öwezgeldiýewa 3-nji orny eýelemegi başardy. Bäsleşik 2024-nji ýylyň iýul-noýabr aýlary aralygynda geçirildi hem-de dürli ugurlarda – tehnologiýa we ykdysadyýet, ynsanperwer ylymlar we sungat, saglyk we sport, takyk we tebigy ylymlar boýunça geçirildi.
Ejegül Öwezgeldiýewa bu bäsleşikde gazanan üstünlikleri üçin Türkmenistanyň Bilim ministrliginiň degişli derejeli diplomy hem-de gymmat bahaly sowgady bilen sylaglanyldy.
Türkmenistanda sanly bilim ulgamynyň ösdürilmegine we innowasiýalaryň durmuşa geçirilmegine berilýän ýokary derejeli goldaw milli ösüşimiziň möhüm bölegi bolup durýar. Bu ugurdaky üstünliklerimiz Watanymyzyň täze belentliklere ýetmegine mynasyp goşant goşar.