11-nji sentýabrda Aba Annaýew adyndaky Halkara atçylyk akademiýasynda Magtymguly Pyragy - ähli döwürleriň we köňülleriň şahyry atly aýdym-sazly döredijilik duşuşygy geçirildi.
Döredijilik duşuşygyna Türkmenistanyň Ylymlar akademiýasynyň Magtymguly adyndaky Dil, edebiýat we milli golýazmalar institutynyň esasy ylmy işgäri, filologiýa ylymlarynyň kandidaty Täzegül Täçmämmedowa, “Garagum” žurnalynyň jogapkär kätibi Nurtäç Annamuhammedowa şeýle hem Aba Annaýew adyndaky Halkara atçylyk akademiýasynyň mugallymlary we agzybir talyp ýaşlary gatnaşdylar.
Döredijilik duşuşygyna gatnaşanlar binýady berkden tutulan Berkarar döwletiň täze eýýamynyň Galkynyşy döwründe Arkadagly Gahryman Serdarymyzyň baştutanlygynda has uly belentlikleri nazarlap, ynamly öňe barýan ýurdumyzyň her gününe ajaýyp pursatlary, şanly wakalary bagyşlaýandygy, biri-birinden zyýada bolup gelýän ýyllaryň hersi altyn sene bolup taryha ýazylýandygy, Garaşsyzlyk ýyllarynda giň gerimli özgertmeleriň we taryhy ähmiýetli maksatnamalaryň durmuşyna öwürilen Türkmenistan ähli ugurlarda bedew bady bilen öňe barýandygy barada giňişleýin gürrüň berdiler.
Özleriniň ruhy halypasy höküminde döredijilik işgärleri Magtymguly Pyraga bagyşlap döreden hem-de Berkarar döwletiň täze eýýamynyň Galkynyşy döwründe Türkmen halkynyň Milli Lideri Gahryman Arkadagymyzyň döwletli başlangyçlary bilen, Hormatly Prezidentimiz Arkadagly Gahryman Serdarymyzyň parasatly baştutanlygynda bedew bady bilen rowaçly ýollarda ösüşlere beslenýän ýurdumyzyň waspyny ýetirýän goşgularyny joşgunly çeper okadylar we giňişleýin çykyş etdiler.
Türki medeniýetiň halkara guramasynyň — TÜRKSOÝ-nyň hemişelik geňeşiniň mejlisinde 2024-nji ýylyň «Beýik türkmen şahyry we akyldary Magtymguly Pyragy ýyly» diýlip yglan edilmegi, şeýle hem Magtymguly Pyragynyň golýazmalar toplumynyň BMG-niň Bilim, ylym we medeniýet meseleleri boýunça guramasynyň «Dünýäniň hakydasy» maksatnamasynyň halkara sanawyna hem-de Magtymguly Pyragynyň 300 ýyllygynyň 2024-2025-nji ýyllarda ÝUNESKO bilen bilelikde bellenilip geçiljek şanly seneleriň sanawyna girizilmeginiň nusgawy şahyrymyzyň döredijiliginiň dünýä derejesinde ykrar edilýändiginiň aýdyň subutnamasydygyny aýratyn belläp geçdiler. Dabaranyň dowamynda Aba Annaýew adyndaky Halkara atçylyk akademiýasynyň talyp ýaşlarynyň ýerine ýetirmeginde ajaýyp aýdymlar ýerine ýetirildi.
Döredijilik duşuşygynyň ahyrynda beýik şahsyýetlerimizi, akyldar danalarymyzyň döredijiligini öwrenmäge ähli mümkinçilikleri döredip berýän Türkmen halkynyň Milli Lideri Gahryman Arkadagymyza, Hormatly Prezidentimiz Arkadagly Gahryman Serdarymyza alkyş sözlerini aýtdylar.
Bekgylyç Agaýew,
Aba Annaýew adyndaky Halkara atçylyk
akademiýasynyň mugallymy