«Pähim-paýhas ummany Magtymguly Pyragy» diýlip atlandyrylan 2024-nji ýylda Türkmen bedewiniň milli baýramy mynasybetli dabaralaryň, bäsleşikleriň döwlet derejesinde giň gerimde ýaýbaňlandyrylmagy behişdi ahalteke bedewlerine goýulýan belent hormat-sarpanyň aýdyň subutnamasydyr. Mälim bolşy ýaly şu ýyl baýramçylyk ilkinji gezek şöhratly ahalteke atlarynyň gadymy mekanynda Arkadag şäherinde geçirildi. Aba Annaýew adyndaky Halkara atçylyk akademiýamyz behişdi bedewlerimiziň hormatyna geçirilýän bäsleşikleriň merkezine öwrüldi. Ýokary okuw mekdebimiziň talyplary Türkmen bedewiniň milli baýramy mynasybetli geçirilýän bäsleşiklerde baýrakly orunlara, Şa serpaýa mynasyp boldylar.
2024-nji ýylyň 23-nji aprelinde Ahal welaýatynyň Ak bugdaý etrabynyň çäginde uzak aralyga atly ýöriş bäsleşiginde akademiýamyzyň “Seýisçilik” taýýarlygyň ugrunyň 1-nji ýyl talyby Annaýew Orazgeldi Mertebeli we Dumanly diýen atlaryň neslinden bolan, 2017-nji ýylda doglan Meşhur diýen dor bedewi bilen 60 kilometr menzili jemi 1 sagat 26 minut 17 sekuntda geçmegi başaryp I baýrakly oruna mynasyp boldy.
2024-nji ýylyň 26-njy aprelinde Halkara ahalteke atçylyk toplumynyň ýapyk manežinde atly sportuň päsgelçiliklerden atly bökmek – konkur bäsleşiginde akademiýamyzyň “Atly sport we atly syýahatçylyk” taýýarlyk ugrunyň 1-nji ýyl talyby Garajaýew Ýazgeldi Toýçy diýen aty bilen I baýrakly oruna mynasyp boldy.
2024-nji ýylyň 28-nji aprelinde Türkmen bedewiniň milli baýramy mynasybetli Halkara ahalteke atçylyk sport toplumynda geçirilen at çapyşyklaryň bäsleşiginde akademiýamyzyň “Atçylyk” hünäriniň 1-nji ýyl talyby Myradow Şageldi I orna mynasyp boldy. Ýeňiji bolan talyplarymyza 2024-nji ýylyň 28-nji aprelinde Halkara ahalteke atçylyk sport toplumynda Hormatly Prezidentimiziň adyndan gymmat bahaly sowgatlar, uly möçberli pul baýraklary we diplomlar gowşuruldy.
Şöhratly pederlerimizden miras galan asylly däpler Gahryman Arkadagymyzyň başlangyçlaryny üstünlikli dowam etdirýän hormatly Prezidentimiz Arkadagly Gahryman Serdarymyzyň taýsyz tagallalary bilen yzygiderli ösdürilýär. Biz hem öz gezegimizde Gahryman Arkadagymyza, Arkadagly Gahryman Serdarymyza alyp barýan il-ýurt bähbitli, döwlet ähmiýetli işlerinde uly-uly üstünlikleri arzuw edýäris! Goý Gahryman Arkadagymyzyň, Arkadagly Gahryman Serdarymyzyň janlary sag, başlary dik bolsun, tutýan tutumly işleri elmydama rowaçlyklara beslensin!
Ejegül Öwezgeldiýewa
Aba Annaýew adyndaky Halkara atçylyk akademiýasynyň
kafedrasynyň müdiri, uly mugallym