«Pähim-paýhas ummany Magtymguly Pyragy» ýylynda geçirilen Türkmen bedewiniň Milli baýramy ýatdan çykmajak wakalara baý boldy. Gahryman Arkadagymyzyň Arkadag şäherine iş saparynyň çäklerinde Türkmen bedewiniň Milli baýramyna taýýarlyk işleriniň barşy hem-de akademiýanyň işi bilen tanyşmak maksady bilen Aba Annaýew adyndaky Halkara atçylyk akademiýasyna gelmegi şol wakalaryň başlangyjy boldy.
Her ýyl däp bolşy ýaly, bu baýramçylygyň çäklerinde “Ýylyň iň owadan ahalteke bedewi” atly halkara gözellik bäsleşigi geçirilýär. Şol bäsleşigiň jemleýji tapgyry Aba Annaýew adyndaky Halkara atçylyk akademiýasynda geçirildi. Bu dabaraly çäre mynasybetli Hormatly Prezidentimiz Arkadagly Gahryman Serdarymyzyň şa gadamy şu ýere düşdi. Owadandan owadan ahalteke bedewleriniň arasyndan iň owadany Gadymy atly bedew bäsleşigiň ýeňiji boldy. Türkmen bedewiniň milli baýramy mynasybetli Arkadagly Gahryman Serdarymyza ýurdumyzyň welaýatlarynyň, paýtagt şäherimiz Aşgabadyň ýaşaýjylarynyň adyndan owadan bedewler, Arkadag şäheriniň hem-de bu şäheriň Kärizek etrabynyň Aba Annaýew adyndaky şäherçesiniň atşynaslarynyň adyndan bolsa 2024-nji ýylda doglan taý sowgat berildi. Hormatly Prezidentimiz bu sowgatlary kabul etdi hem-de pederleriniň ýoluna hem-de ýurdumyzda bellenilýän şanly waka, ýagny Magtymguly Pyragynyň doglan gününiň 300 ýyllygy mynasybetli ýaş taýa Ylham diýip at goýdy. Arkadagly Gahryman Serdarymyzyň özüne sowgat berlen bedewleri Aba Annaýew adyndaky Halkara atçylyk akademiýasyna sowgat bermegi, baýramçylyk çäresine gatnaşýan ähli adamlarda, Aba Annaýew adyndaky Halkara atçylyk akademiýasynyň mugallymlarynda we talyplarynda egsilmez şatlyk duýgusyny döretdi.
Türkmen bedewiniň Milli baýramy mynasybetli geçirilen çäreler bir-birine sepleşip, özleriniň çuňňur manylylygy bilen ýatdan çykmajak buýsançly wakalara baý boldy. Bize şular ýaly ajaýyp baýramçylyklary, şatlykly wakalary peşgeş berýän Gahryman Arkadagymyza, Arkadagly Gahryman Serdarymyza egsilmez sagbolsunlar aýdýarys. Gahryman Arkadagymyzy, Arkadagly Gahryman Serdarymyzy, ähli türkmen halkymyzy, atşynaslarymyzy Türkmen bedewiniň Milli baýramy bilen tüýs ýüregimizden gutlaýarys. Gahryman Arkadagymyzyň, Arkadagly Gahryman Serdarymyzyň janlary sag, ömürleri uzak bolsun, alyp barýan işleri elmydama rowaçlyklara beslensin!