«Pähim paýhas ummany Magtymguly Pyragy» ýylynyň 25-nji aprelinde Türkmen bedewiniň milli baýramynyň giňden bellenilýän günlerinde Aba Annaýew adyndaky Halkara atçylyk akademiýamyzyň uly mejlisler zalynda “Türkmen bedewi we dünýäniň seýisçilik sungaty” atly XVI halkara ylmy maslahaty geçirildi. Bu maslahata Halkara ahalteke atçylyk assosiasiýasynyň, “Türkmen atlary” döwlet birleşiginiň hünärmenleri we atşynaslary hem-de ýurdumyzyň ýokary okuw mekdepleriniň professor-mugallymlary we talyp ýaşlary gatnaşdylar.
Şeýle hem ýurdumyza myhman bolup gelen Halkara ahalteke atçylyk assosiasiýasynyň agzasy, Germaniýa Federatiw Respublikasynyň “Katharina Jakob Equestrian Coaching” kompaniýasynyň esaslandyryjysy we dolandyryjysy, Türkmenistanyň at gazanan atşynasy Katharina Irena Anna Margaretha Jakob hem gatnaşdy. Maslahatda çykyş edenler halkymyzyň milli buýsanjyna we guwanjyna öwrülen, dünýä ýüzünde gözelligiň hem kämilligiň nusgasy hasaplanýan, ahalteke atlarynyň şan-şöhratyny dünýä ýaýmakda, atşynaslyk we seýisçilik sungatyny, atçylyk sportyny ösdürmekde alnyp barylýan işler bilen bir hatarda, türkmen bedewiniň tohum arassalygyny gorap saklamak hem-de olaryň halkara derejesinde geçirilýän atly sport ýaryşlarynda, sirk festiwallarynda gazanan üstünliklerini nygtap, bu ugurda türkmen halkynyň milli Lideri Gahryman Arkadagymyzyň, hormatly Prezidentimiz Arkadagly Gahryman Serdarymyzyň taýsyz tagallarynyň bardygyny bellediler. Soňra bu halkara ylmy maslahaty öz işini 3 bölümde, ýagny “Berkarar döwletiň täze eýýamynyň Galkynyşy döwrüniň behişdi bedewleri” ady bilen akademiýanyň kiçi mejlisler zalynda, “Ahalteke atlaryny ösdürip ýetişdirmekde türkmen seýisçilik sungatynyň aýratynlyklary” ady bilen akademiýanyň kitpahanasynda hem-de “Ahalteke atlarynyň gatnaşmagynda beýleki at tohumlarynyň döredilmeginiň ylmy esaslary” diýen ady bilen akademiýanyň 5-nji gatynda ýerleşýän mejlisler otagynda dowam etdi.
Maslahata gatnaşyjylar milli ýörelgelerimiziň dowamat-dowam bolmagy, atçylyk däplerimiziň goralmagy we ösdürilmegi ugrunda irginsiz alada edýän Gahryman Arkadagymyzyň Arkadagly Gahryman Serdarymyzyň adyna hoşallyk sözlerini beýan etdiler.