Aba Annaýew adyndaky Halkara atçylyk akademiýasynda hormatly Prezidendimiz Arkadagly Gahryman Serdarymyzyň jöwher paýhasyndan dörän «Änew – müňýyllyklardan gözbaş alýan medeniýet» atly kitabynyň tanyşdyrylyş dabarasy geçirildi.
Tanyşdyrylyş dabarasynda çykyş edenler Änew şäheriniň 2024-nji ýylda “Türki dünýäsiniň medeni paýtagty” diýlip yglan edilmegine bagyşlap, Arkadagly Gahryman Serdarymyzyň “Änew - müňýyllyklardan gözbaş alýan medeniýet” atly ajaýyp eserini peşgeş bermegi bütin türkmen halkyna gymmatly sowgat bolandygyny, bu kitapda beýik taryhymyzyň şöhratly sahypalary giňden beýan edilip, gadymy Änew şäheri diňe taryhy bilen däl, eýsem şu günki ajaýyplygy we uzak gelejege gönügen ösüşli beýik maksatlary bilen dünýäniň ünsüni özüne çekýändigi hakynda uly buýsanç bilen beýan etdiler. Arkadagly Gahryman Serdarymyzyň täze ylmy populýar eseriniň ýaş nesli watançylyk ruhunda terbiýelemekde, täze bilimleri öwrenmäge höweslendirmekde, ildeşlerimizi zähmet ýeňişlerine ruhlandyrmakda gymmatly gollanma boljakdygyny ynam bilen belläp geçdiler.
Dabaranyň dowamynda oňa gatnaşyjylar hormatly Prezidentimiz Arkadagly Gahryman Serdarymyzy “Änew - müňýyllyklardan gözbaş alýan medeniýet” atly täze kitabynyň çapdan çykmagy bilen tüýs ýürekden gutladylar. Baý milli mirasymyzyň çuňňur öwrenilmegi, dünýäde wagyz edilmegi hem-de geljek nesillere ýetirilmegi babatda edýän taýsyz tagallalary üçin türkmen halkynyň Milli Lideri Gahryman Arkadygymyza, Arkadagly Gahryman Serdarymyza tüýs ýürekden hoşallyk bildirdiler.
Aýjemal Baýramowa
Aba Annaýew adyndaky
Halkara atçylyk akademiýasynyň
Kitaphanasynyň bölüm müdiri