Aba Annaýew adyndaky Halkara atçylyk akademiýasynda "Millilige gymmatym, mirasyma hormatym” atly aýdym-sazly döredijilik duşuşygy geçirildi.
Häzirki zaman jemgyýetimiziň ruhubelentliginiň, zähmetsöýerliginiň aýdyň nyşany bolan Nowruz baýramy halkymyzy ösüşiň täze belentliklerine ruhlandyryp, ýüreklerde ata Watanymyza, bagtyýar şu günümize hem-de nurana geljegimize buýsanç duýgularyny berkidýär. Munuň özi diňe bir ykdysady taýdan däl, eýsem, durmuş, jemgyýetçilik-syýasy ösüşi, medeni hem-de ruhy baýlygy alamatlandyrýar. Nowruz baýramy mynasybetli geçirilen baýramçylyk dabarasy bularyň ählisiniň ajaýyp beýany boldy.
Baýramçylyk dabarasyna gatnaşan Arkadag şäheriniň ýaşaýjylary kümüş saçly eneler, dürli pudakda zähmet çekýän hünärmenler, akademiýanyň mugallymlary Halkara Nowruz güni Milli Bahar baýramynyň taryhy, däp-dessurlary barada we Berkarar döwletimiziň täze eýýamynyň Galkynyşy döwründe uludan tutulýan toý dabarasynyň täsiri hakynda giňişleýin gürrüň berdiler hem-de talyp gyzlara gadymdan gelýän ene-mamalarymyzyň haly, keçe, keşdeçilik sungatynyň inçe syrlaryny öwretmekde öz tejribelerini görkezdiler. Ýurdumyzda tanymal bagşy zenanlaryň aýdan aýdymlary, Aba Annaýew adyndaky Halkara atçylyk akademiýasynyň talyp gyzlarynyň ýerine ýetiren läleleri, monjuk atdylary, birnäçe aýdymlary baýramçylyk dabarasynyň şowhunyny has-da artdyrdy.
Baýramçylygyň geçýän ýeriniň milli ruhda bezelmegi türkmeniň ak öýleriniň bezegleriniň, türkmeniň kalbyndan dörän haly, keçe önümleriniň, türkmen gelin-gyzlarynyň toý lybaslarynyň, milli şaý-sepleriniň giňden ýerlikli ulanyp bezelmegi, talyp gyzlaryň keşde çekmek, haly dokamak işlerini edýän pursatlarynyň sazlaşykly ýerine ýetirilmegi ajaýyp döwrümizde milliligimiziň dabaralanýandygyny görkezýär.
Dabara gatnaşanlar milli mirasymyza, pederlerimiziň ruhy we medeni gymmatlyklaryna bimöçber sarpa goýýan şeýle-de milli baýramçylyklarymyzy uly şatlyk–şowhunly bellemegimize şeýle mümkinçilikleri döredip berýän türkmen halkynyň Milli Lideri Gahryman Arkadagymyza, Hormatly Prezidentimiz Arkadagly Gahryman Serdarymyza köp-köp sagbolsynlaryny aýtdylar. Türkmen halkynyň Milli Lideri Gahryman Arkadagymyzyň, Hormatly Prezidentimiz Arkadagly Serdarymyzyň janlarynyň sag, ömürleriniň uzak, belent başlary aman bolmagyny arzuw etdiler, şeýle-de pursatdan peýdalanyp ähli türkmen halkyny, türkmen halkynyň Milli Lideri Gahryman Arkadagymyzy, Arkadagly Gahryman Serdarymyzy Halkara Nowruz güni, Milli Bahar baýramy bilen tüýs ýürekden mähirli gutladylar.
Maral Akmyradowa
Aba Annaýew adyndaky Halkara atçylyk
akademiýasynyň mugallymy, akademiýanyň
ilkinji Zenanlar guramasynyň başlygy