Berkarar döwletiň täze eýýamynyň Galkynyşy döwründe ylym-bilimiň has-da ösdürilmegine, ylmyň iň täze gazananlaryna, bilim bermegiň döwrebap usullaryna, sanly tehnologiýalara aýratyn üns berilýär. Munuň özi, ilkinji nobatda, bilim binýadynyň berkidilýändigi, kämil hünärmenleriň taýýarlanylýandygy bilen berk baglanyşyklydyr.
Arkadag Serdarly bagtyýar ýaşlar ýylynyň Bilimler we talyp ýaşlar güni paýtagtymyzda hem-de ýurdumyzyň dürli künjeginde täze gurlan bilim ojaklary, terbiýeçilik edaralary bilen birlikde Arkadag şäherinde ýerleşýän Aba Annaýew adyndaky Halkara atçylyk akademiýasynyň hem Hormatly Prezidentimiz Arkadagly Serdarymyz tarapyndan açylyp ulanlymaga berilmegi buýsançly başymyzy göge ýetirdi. Şeýle hem şol dabaraly pursatda ýokary okuw mekdebimiz halkara şahadatnamalaryň birnäçesine mynasyp boldy. Ýewraziýa atly sport assosiasiýasynyň prezidenti Marina Seçina hormatly rektorymyza sebitde atçylyk we atly sport boýunça ýokary hünärmenleri taýýarlaýan ilkinji halkara akademiýa bolan Aba Annaýew adyndaky Halkara atçylyk akademiýasynyň Türkmenistanda döredilendigi üçin Ýewraziýa atly sport assosiasiýasynyň Hormat şahadatnamasyny gowşurdy.
Täze ýokary okuw mekdebi, şeýle hem Aziýa atly sport federasiýasynyň “Sebitde atly sport boýunça ýokary bilimli hünärmenleri taýýaralamakda ähli mümkinçilikleri we amatlyklary bolan Halkara akademiýa” atly şahadatnamasyna mynasyp boldy. Bu şahadatnamany ýokary okuw mekdebimiziň rektoryna Kataryň Atçylyk federasiýasynyň Baş sekretary Şeýh Ahmed bin Nh Al-Tani dabaraly ýagdaýda gowşurdy. Häzirki wagtda atçylyk ugrunyň özbaşdak ýokary okuw mekdebi hökmünde döredilmegi bu ugurda başy başlanan döwletli işleri has-da ösdürmäge ýardam berer. Bu Halkara atçylyk akademiýasynyň otaglarynda 2023-2024-nji okuw ýylyna başlanyp talyp ýaşlar bilen nazary, tejribe sapaklary guralyp başlandy.
Arkadag şäheriniň Aba Annaýew adyndaky Halkara atçylyk akademiýasynyň daşky bezeg aýratynlyklary, onuň ýazgylary her bir ynsanyň ünsüni özüne çekýär, ol ýerde Aba Annaýew adyndaky Halkara atçylyk akademiýasynyň adynyň nalyň şekiliniň içinde ýerleşdirilmegi özboluşly many berýär. Türkmen halky naly şowlulygyň, rowaçlygyň nyşany hökmünde görýär. Pederlerimiziň irginsiz zähmetinden kemal tapan behişdi bedewler özüniň owadanlygy, çeýeligi we ýyndamlygy bilen rowaýata, halkymyzyň milli gymmatlygyna we buýsanjyna öwrüldi. Şeýle hem binanyň bezeginde türkmen halky üçin milli gymmatlyk hasaplanýan atyň nalynyň, üzärligiň, dagdan agajynyň ulanylmagy halkymyzyň döreden ýagşy dessurlarynyň häzirki döwürde ösdürilýändigini görkezýär.
Şeýlelikde, şu günki ajaýyp zamanamyzda Arkadag şäherinde açylyp ulanylmaga berilen Aba Annaýew adyndaky Halkara atçylyk akademiýasy milli seýisçilik, çapksuwarlyk, atşynaslyk hünärlerini ösdürmekde geljekki ýaş hünärmenlere bilim, ylym, watançylyk terbiýesini bermekde uly işleri durmuşa geçirer.
Biz ýurdumyzda milli buýsanjymyz bolan ahalteke bedewlerini seýisläp ýetişdirmekde, milli atşynaslyk ylmyny we hünärini ösdürmekde taýsyz tagallalary durmuşa geçirýän Gahryman Arkadagymyza, Arkadagly Serdarymyza uzak ömür, jan saglyk, döwletli başlangyçlarynda uly üstünlikleri arzuw edýäris.