Berkarar döwletiň täze eýýamynyň Galkynyşy döwründe Gahryman Arkadagymyzyň hem-de Arkadagly Gahryman Serdarymyzyň parasatly ýolbaşçylygynda türkmen halkymyz baky bagtyýarlygyň, täze ösüşleriň şaýady bolup, asuda, agzybir, parahat durmuşyň hözürini görüp ýaşaýar. Bu günki gün amala aşyrylýan her bir işde halkymyzyň, aýratynam ýaş neslimiziň röwşen geljegi nurlandyrylýar. Tamamlanan “Arkadag Serdarly bagtyýar ýaşlar” diýlip atlandyrylan ýylymyz hem ýaşlarymyzyň durmuşynda täze sahypalary açdy.
Türkmen ýaşlary üçin ähli babatda uly üstünliklere beslenen 2023-nji “Arkadag Serdarly bagtyýar ýaşlar” ýylynyň netijeleri boýunça Türkmenistanyň söwda senagat edarasynda gurnalan halkara sergisi we ylmy-amaly maslahaty ýokary guramaçylykda geçirildi. Bu sergide ýaşlarymyzyň ýylyň dowamynda sportda, ylymda bilimde, medeniýetde we beýleki ugurlarda gazanan üstünlikleri aýdyň şöhlelendirildi. Pudak edaralaryna we ýokary okuw mekdeplerine bölünip berlen ýerlerde sanly ulgamyň mümkinçilikleriniň giňden ornaşdyrylmagy sergä özboluşly öwüşgün çaýdy. Aba Annaýew adyndaky Halkara atçylyk akademiýamyzyň pawilionynda atçylyk pudagymyzy ylmy esasda öwrenmekde soňky tejribeleriň ýerleşdirilmegi bu ýere gelen myhmanlarda aýratyn gyzyklanma döretdi. Olar üçin pawilionymyzda sanly ulgam arkaly 3D görnüşinde akademiýamyz bilen tanyşmaga, atçylyk bilen baglanşykly dürli zehin oýunlaryny oýnamaga, atyň anatomiýasyny 3D görnüşinde öwrenmäge mümkinçilikler döredildi. Şeýle-de akademiýamyzyň pawilionyna gelen her bir myhman uly gyzyklanma bilen ahalteke bedewlerimiziň şaý-seplerini, meşhur Akhan atly atyň heýkelini we beýleki gözellikleri uly höwes bilen synladylar.
“Arkadag Serdarly bagtyýar ýaşlar” ýylynyň netijelerine bagyşlanan sergi halkara ylmy-amaly maslahat bilen dowam etdirildi. Bu maslahatda çykyş eden daşary ýurtly ýokary derejeli myhmanlar Gahryman Arkadagymyzyň, Arkadagly Gahryman Serdarymyzyň baştutanlygynda ýaşlarymyzyň dünýä derejesinde gazanýan üstünliklerine ýokary derejede baha berdiler. Ylmy-amaly maslahatyň dowamynda aýratyn tapawutlanan ýaşlarymyza Milli Liderimiziň we Hormatly Prezidentimiziň adyndan gymmat bahaly sowgatlar gowşuryldy.
Daýanç Reýimow
Aba Annaýew adyndaky Halkara
atçylyk akademiýasynyň mugallymy