Berkarar döwletiň täze eýýamynyň Galkynyşy döwründe Türkmen halkynyň Milli Lideri Gahryman Arkadagymyzyň saýasynda, Arkadagly Gahryman Serdarymyzyň parasatly ýolbaşçylygynda ýurdumyzda ähli ulgamlar bilen bir hatarda ylym-bilim ulgamy hem ýokary derejede ösdürilýär. Türkmen ýaşlarynyň ylymly-bilimli, giň dünýägaraýyşly, ýokary ahlakly, watançy ýaşlar bolup ýetişmegi ugrunda yzygiderli işler amala aşyrylýar.
Aba Annaýew adyndaky Halkara atçylyk akademiýasynyň gurnamagynda ýurdumyzyň Tebigy ylmy ugurly dersleri çuňlaşdyryp öwredýän ýöriteleşdirilen mekdep okuwçylarynyň arasynda 5-6-njy dekabrynda biologiýa we himiýa dersleri boýunça “Açyk internet olimpiýadasy” geçirildi. Bäsleşigiň esasy maksady Türkmenistanyň bilim ulgamynyň dünýäniň ylym-bilim giňişligine sazlaşykly aralaşýan döwründe Garaşsyz Watanmyza, mähriban halkymyza, Hormatly Prezidentimize wepaly, ylymly-bilimli, giň dünýägaraýyşly, ýiti zehinli ukyply we başarjaň ýaşlary ýüze çykarmakdan ybarat bolup, bäsleşik bellenilen düzgünnama esasynda ýokary derejede geçirildi. Olimpiýada sanly ulgam arkaly ýurdumyzyň ähli welaýatlarynyň Tebigy ylmy ugurly dersleri çuňlaşdyryp öwredýän ýöriteleşdirilen mekdep okuwçylarynyň gatnaşmagynda geçirilmegi aýratyn bellärliklidir. Bäsleşigiň netijeleri boýunça üstünlikli çykyş edip tapawutlanan mekdep okuwçylary degişlilikde baýrakly orunlara mynasyp boldular. Döwlet derejesinde geçirilýän bäsleşigiň öňisyrasynda geçirilen bu bäsleşik mekdep okuwçylarynyň bilimlerini barlamaga hem-de çuňlaşdyrmaga giňden ýardam etdi. Bäsleşige gatnaşyjylar türkmen ýaşlarynyň ylymly-bilimli bolmaklary ugrunda döredip berýän giň mümkinçilikleri üçin Gahryman Arkadagymyza, Arkadagly Gahryman Serdarymyza tüýs ýürekden alkyş aýtdylar.
Atanur Kylyşow
Aba Annaýew adyndaky Halkara
atçylyk akademiýasynyň kafedra müdiri
