2023-nji ýylyň 14-17-nji noýabrynda Magtymguly adyndaky Türkmen döwlet uniwersitetinde Himiýa dersi boýunça II Halkara internet olimpiadasy geçirildi. Olimpiada ýurdumyzyň 19 sany ýokary okuw mekdepleriniň talyplary bilen bir hatarda, daşary ýurtlaryň 23-siniň ýokary okuw mekdeplerinden, ýagny, Russiýa Federasiýasynyň, Gazagystan Respublikasynyň, Azerbaýjan Respublikasynyň, Özbegistan Respublikasynyň, Täjigistan Respublikasynyň, Belarus Respublikasynyň, Türkiýe Respublikasynyň, Pakistanyň, Gyrgyz Respublikasynyň, Ermenistanyň, Slowakiýanyň, Çehiýanyň, Günorta Koreýanyň, Hytaý Halk Respublikasynyň, Wengriýanyň, Daniýanyň, Beýik Britaniýanyň, Amerikanyň Birleşen Ştatlarynyň, Şri-Lankanyň, Birleşen Arap Emirlikleriniň, Germaniýa Federatiw Respublikasynyň, Awstriýanyň we Ýaponiýanyň ýokary okuw mekdepleriniň 57-sinden talyplaryň 371-si gatnaşdy.
Olimpiada himiýa ugurly hünärlerde okaýan talyplaryň arasynda A derejede boýunça, beýleki hünärlerde okaýan talyplaryň arsynda bolsa B dereje boýunça geçirildi. Eminler toparynyň hataryndaky halkara bilermenleriniň taýýarlan meseleleri çylşyrymlylygy boýunça tapawutlandy. Olimpiadanyň A we B derejeler boýunça baýrakly orunlara mynasyp bolan talyplar sylaglanyldy we üç dereje boýunça diplomlar gowşuryldy.
Himiýa dersi boýunça II Halkara internet olimpiadasynda Aba Annaýew adyndaky Halkara atçylyk akademiýamyzdan çykyş eden talyplar hem bu abraýly bäsleşigiň ýeňijileri bolmagy başardylar. Akademiýamyzyň 1-nji ýyl talyplary Rowşenkulyýew Baýramhan hem-de Garajaýew Lukmanhekim halkara derejesinde geçirilen bäsleşikde baýrakly III orunlary eýelemekligi başardylar.
Jumaýew Hangeldi
Aba Annaýew adyndaky Halkara atçylyk akademiýasynyň kafedra müdiri