Ajaýyp zamanamyzda Gahryman Arkadagymyzyň, Arkadagly Gahryman Serdarymyzyň parasatly ýolbaşçylygynda medeniýetimizi, milli mirasymyzy, edebiýatymyzy öwrenmekde giň gerimli işler durmuşa geçirilýär. Türkmen edebiýaty diýlende ilki bilen Magtymguly Pyragy göz öňünde janlanýar.
Sebäbi şygryýet ummanynyň akyldary Magtymguly Pyragy akyl-paýhasa ýugrulan dürdäne eserleri bilen dünýä edebiýatynyň genji-hazynasyny baýlaşdyran beýik söz ussadydyr.
«Pähim-paýhas ummany Magtymguly Pyragy» ýylynda Magtymguly Pyragynyň döredijiligini giňden wasp etmek, talyp ýaşlaryň döredijilik ukyplaryny kämilleşdirmek, özbaşdak pikirlenmek, pikirlerini ýazmaça beýan etmek, özbaşdak işlemek endiklerini kemala getirmek, zehinli we ukyply ýaşlary ýüze çykarmak, olaryň döredijilik başarnyklaryny ýokarlandyrmak maksady bilen Aba Annaýew adyndaky Halkara atçylyk akademiýasynda ýurdumyzyň ýokary okuw mekdepleriniň talyp ýaşlarynyň arasynda «Magtymguly Pyragy – göwünleriň çyragy» ady bilen düzme ýazmak boýunça bäsleşik geçirildi.
Düzmäniň temasy Magtymguly Pyragynyň döredijiliginiň dürli ugurlaryna degişli bolup, bäsleşik talyp ýaşlaryň öz ukyp başarnyklaryny açyp görkezmäge uly mümkinçilik boldy. Bäsleşige gatnaşyjylar türkmen ýaşlarynyň döwrebap ylymly-bilimli bolmaklary ugrunda ähli zerur şertleri döredip berýän Gahryman Arkadagymyza, Arkadagly Gahryman Serdarymyza tüýs ýürekden alkyş sözlerini aýtdylar.
Kakageldi Çaryberdiýew
Aba Annaýew adyndaky
Halkara atçylyk akademiýasynyň
mugallymy, Ýaş alymlar Geňeşiniň başlygy