Aba Annaýew adyndaky Halkara atçylyk akademiýasynyň gurnamagynda Türkmenistanyň hemişelik Bitaraplygynyň şanly 30 ýyllygy, Birleşen Milletler Guramasynyň döredilmeginiň 80 ýyllygy hem-de Halkara parahatçylyk we ynanyşmak ýyly mynasybetli ýurdumyzyň we daşary ýurtlaryň ýokary okuw mekdepleriň talyplarynyň arasynda “Halkara parahatçylyk we ynanyşmak - ykdysady ösüşleriň özeni” atly geçirilen halkara internet olimpiadasynyň jemi jemlenip onda ýeňiji bolanlaryň sylaglanyş dabarasy geçirildi. Mälim boluşy ýaly Halkara internet olimpiadasy Arkadag şäherinde ýerleşýän Aba Annaýew adyndaky Halkara atçylyk akademiýasynyň gurnamagynda ilkinji gezek geçirilip, oňa dünýäniň 15 döwletinden 72 sany ýokary okuw mekdebinden jemi 535 sany talyp ýaşlar işjeň gatnaşdylar. Ýokary derejede çekeleşikli geçirilen bäsleşigiň netijeleri boýunça jemi 106 sany gatnaşyjy bäsdeşlerinden saýlanyp ýurdumyz boýunça 66 sany talyp, daşary ýurt ýokary okuw mekdeplerinden 40 sany talyp bäsleşigiň ýeňijisi diýilip yglan edildi we I, II we III orunlara mynasyp boldular.
Halkara olimpiadanyň ýeňijilerine Aba Annaýew adyndaky Halkara atçylyk akademiýasynyň rektory tarapyndan diplomlar we Arkadag şäheriniň Jemgyýetçilik guramalarynyň we syýasy partiýalarynyň adyndan ýadygärlik sowgatlar gowşuryldy. Sowgat gowşurylyş dabarasy tamamlanandan soň akademiýanyň talyp ýaşlarynyň ýerine ýetirmeginde aýdym-sazly çykyşlar has-da täsirli boldy. Onda ýerine ýetirilen ajaýyp aýdymlardyr çeper okaýyşlar dabara gatnaşyjylaryň baýramçylyk joşgunyny has-da artdyrdy.
“Halkara parahatçylyk we ynanyşmak - ykdysady ösüşleriň özeni” atly halkara internet olimpiadasynyň ýeňijileri hem-de dabara gatnaşyjylar şular ýaly giň mümkinçilikleri döredip berýän Gahryman Arkadagymyza, Arkadagly Gahryman Serdarymyza hoşallyk sözlerini beýan etdiler.
Söýenç Ahmedow
Aba Annaýew adyndaky Halkara atçylyk
akademiýasynyň mugallymy, akademiýanyň
Magtymguly adyndaky ilkinji Ýaşlar guramasynyň başlygy